Tipe-Tipe Caleg di Indonesia
Pikeun urang nu jadi rahayat mah, ngaran pemilu atawa pesta demokrasi teh kadang sok jadi pikapusingeun sorangan. Enya pestana mah meureun nu diparilih, kalayan ngahambur-hambur duit pikeun ngatrol sora manehna engke di acara nyoblos. Ari pikeun rahayat mah, ningali spanduk mangrebu-rebu di unggal tempat geus matak kerung tarang. Kabingung teh nambahan sabab urang teu apal saha aslina ari manehna? Naon wae track record-na? Naon tujuan manehna miluan nyaleg? Naha bener engke bisa dipercaya mun kapilih? Tapi, salain ti eta loba oga meureun caleg nu baleg alias eucreug. Tah, ka baraya hayu urang tengetan ciri-ciri umum caleg di Indonesia, ieu diantarana:
1. Tipe Narsis
Nyieun baliho nu foto manehna pangkasepna atawa panggeulisna. Mun perlu, bere pulasan Photoshop ameh rada mencrang bari programna teu kawakilan nu jelas na baliho, alias dominan keneh beungeut. Ceuk manehna mah meureun pemilu teh sarua jeung pemiliha coverboy atawa covergirl di majalah. Kitu oge nu sok muji-muji diri sorangan, misalna: "Terbukti terpercaya, bersih, jujur, adil, dan selalu membela rakyat!". Pikeun leuwih ngayakinkeun, sok ditambahan difoto bareng jeung tokoh partai atawa tokoh nasional... nya kajeun dipaksa make Photoshop ge.
2. Tipe Beunghar
Manehna boga duit loba. Miluan jadi caleg teh anggap we tetembakan: meunang syukur, teu meunang teu matak jadi pikiraneun teuing. Pikeun manehna mah nyalon teh dianggap nyalurkeun hobi. Duit dikaluarkeun pikeun nyewa tim sukses, alat-alat peraga, jeung sajabana. Leuwih pas mun disebut "si bos".
3. Tipe Idealis Muringis
Manehna loba koar-koar, idealismena numpuk tapi duitna pas-pasan, malah mungkin teu boga.
4. Tipe Linglung
Teu boga duit jeung miskin idealisme. Pikeun manehna mah kapilih teh dianggap lolos ditarima gawe. Mun teu kapilih, ieu nu bahaya sabab manehna potensial jadi jalma stres. Kahayang saluhur gunung, ari modal sagede sayang rinyuh.
5. Tipe Juragan
Ieu mah: duitna loba, jabatan boga, jaringan dimana-mana, jeung geus apal lebah-lebahna pikeun jadi caleg. Manehna mah kari der we, da massa loyalis geus dina leungeun kari diketrukkeun pas waktuna nyoblos. Acan manehna boga tim sukses loyalis nu tiap boga pangabutuh kari laporan ka juragan. Rek iklan di TV atawa media massa sejen ditebak sabaraha ge.
6. Tipe No Pay, No Success
Pikeun manehna mah, nanaon sagala urusan bisa ku duit. Matak sugak-sogok teh kabeukina. Mindeng ngabagikeun duit, mere sembako, atawa nyieun fasilitas kalayan sistem pascabayar. Misalna: jalan dijieun heula diurug ku batu, tah engke mun manehna kapilih karek diaspalan.
7. Tipe Uji Nyali
Manehna mah nanaon pasti dihubungkeun kana urusan nu gaib. Matak teu aneh mun kudu tapa atawa datang ka dukun ge. Pikeun manehna mah, rahayat bisa disirep pas engke nyoblos. Kerja sama jeung makhluk gaib teh jadi kabutuhan utama, teuing meureun manehna teu percaya diri adu hareupan jeung rahayat langsung.
8. Tipe Kukurusukan
Ieu tipe caleg nu wani kukurusukan ka pasar, warung-warung, nepi ka lembur-lembur. Biasa, manehna SKSD... alias Sok Kenal Sok Dekat. Rahayat nu dianjangan teh jiga nu manehna sorangan we. Padahal rahayat mah karerung: "Saha maneh?". Biasana sok milu dahar di warteg, nanya tukang dagang di pasar, terus ngabagi-bagikeun selebaran atawa kaos. Pokona asa aing pangdeukeutna jeung rahayat we.
9. Tipe Ngagogoreng
Ieu mah tipe caleg nu bisana teu weleh ngagogoreng caleg atawa partai lain pikeun ngatrol popularitas manehna. Kalemahan batur teh dijadikeun senjata pikeun manehna naekkeun simpati. Tapi, pas manehna diserang biasana sok kalahkah jadi sewot.
10. Tipe Spam
Ieu mah tipe caleg nu biasa maen di dunia jejaring sosial. Pikeun manehna mah, media jejaring sosial jadi sarana pikeun ngawanohkeun dirina ka rahayat. Biasana make buzzer atawa spin doctor, aya tim khusus nu mantuan manehna nyebar-nyebarkeun pikeun ngangkat citrana. Teu paduli rek di Facebook, Twitter, BBM, WhatsApp, jeung media sosial lainna. Misalna, teu pupuguh jug aya tag ka wall Facebook/Twitter atawa BBM ka urang pikeun ngadukung si caleg.
11. Tipe Audisi
Pikeun caleg tipe ieu mah, pemilu teh kadang sok dianggap kawas audisi Indonesia Idol, mun pemilu kamari teu kapilih, pemilu ka hareupna miluan deui.
Pikeun caleg tipe ieu mah, pemilu teh kadang sok dianggap kawas audisi Indonesia Idol, mun pemilu kamari teu kapilih, pemilu ka hareupna miluan deui.
12. Tipe Terkenal
Tah, ieu mah biasana artis nu miluan nyalon jadi caleg. Rahayat geus arapal manehna artis. Kapopuleran manehna dipake pikeun ngatrol sora na pemilu. Ieu mah boga kauntungan terkenalna tea, jadi sakali ningali na baliho ge geus arapal: "Oooh... si eta nyaleg oge? Nu kamari cerai tea nya? Eta geuning na infotainment ge kungsi rame!"
13. Tipe Sabondoroyot
Ieu mah nyaleg teh jiga wisata keluarga, sakulawarga mariluan. Bapana di Dapil beh wetan; pamajikanna di Dapil beh kulon; anakna di Dapil beh kidul; alona di Dapil beh kaler. Pokona sabondoroyot we eta caleg-caleg teh masih aya hubungan kekeluargaan.
14. Tipe Rek Kawin jeung Motivator
Ieu mah biasana nu masang na baliho, salain aya foto manehna oge aya tulisan: "Mohon do'a restu" jeung biasana ditambahan kalimah-kalimah motivasi, misalna: "Waktunya Bangsa Indonesia Cerdas Cermat dalam Memilih Pemimpin".
© Banyolan Sunda
Follow:
