Twitter Banyolan Sunda
Media Banyolan Sunda salila ieu katelahna mah di Group Facebook Banyolan Sunda oge di blog ieu (www.banyolansunda.com). Kusabab loba oge usulan ti baraya (utamana kaom nonoman) yen Banyolan Sunda boga oge akun di Twitter. Najan akun Twitter Banyolan Sunda dijieun saumur jeung group Facebook, tapi jarang dikokolakeun dieusi twit-twit. Taun 2013 ahir, akun Twitter Banyolan Sunda diaktifkeun deui. Alhamdulillah, nu nga-follow mah leuwih ti 1000. Dina akun Twitter Banyolan Sunda biasa diajangkeun banyolan-banyolan pondok nu saluyu jeung watesan karakter di Twitter nu ngan 140 karakter.
Salain ti ngabanyol, twit di akun Twitter Banyolan Sunda oge digunakeun pikeun ngawanohkeun Komunitas Banyolan Sunda ka baraya nu salila ieu loba aktif di Twitter tibatan di Facebook. Di akun Twitter oge, Banyolan Sunda midangkeun hal-hal nu aya patalina jeung mikawanoh basa Sunda (undak usuk basa, babasan, paribasa, sisindirian, jeung peperenian sejenna). Hal ieu minangka tarekah pikeun ngawanohkeun basa Sunda ka kaom nonoman. Da mun ditengetan mah, geuning heureuy-heurey di Twitter teh loba nu ngagunakeun basa Sunda; utamana nu diurus ku para nonoman. Ngan hanjakal, geuning basa nu dipake lolobana garihal/kasar jeung kurang saluyu jeung ngalarapkeun kecap/kalimah, contona ngalarapkeun hurup "e" jeung "eu", wilujeng ditarulis wilujeung. Tapi dalah kumaha oge, nu penting barudak geus daraek ngagunakeun basa Sunda. Di ieu meureun peran nu barisa jeung ngarti kana basa Sunda pikeun ngabimbing kumaha cara merenahkeun basa Sunda nu luyu tata basa.
Dina akun Twitter oge dijadikeun media pikeun nyalabarkeun informasi, utamana informasi kagiatan kasundaan. Jeung nu tujuan utamana mah pikeun ngaraketkeun tali mimitran jeung baraya Sunda. Ari keur Banyolan Sunda mah, akun Twitter boga kaleuwihan sejen. Nyaeta status nu ditulis teh asa leuwih dihargaan tibatan di Facebook. Mun di Facebook, teu kaop aya status pikaseurieun di group Banyolan Sunda sok loba di copy paste nyebar di group atawa wall baraya. Tah, ku ayana fasilitas ReTweet, status nu dijieun di Twitter mah disebarkeun ka nu sejen kalayan teu ngaleungitkeun saha nu mimiti nyieun eta status. Ieu keur panggeuing oge, yen nu ngaranna nyieun status banyol mah asup kana wilayah kreatif. Komo ieu nu diwates ku jumlah karakter tulisan, meureun leuwih dipeureut mikirna ge tibatan status di Facebook nu bebas rek sabaraha kalimah oge. Ka baraya nu bade silaturahmi sareng Banyolan Sunda di Twitter, mangga tuturkeun (follow) wae akun @banyolansunda.
Follow:
