Pangajian Rutin Baraya Banyolan Sunda Bulan Februari 2014
Poe
Minggu, tanggal 2 Februari 2014 pangajian rutinan Warga Rancabanyol
alias baraya Banyolan Sunda diayakeun di imahna Camat Rancabanyol di
Jln. Jayagiri 1, Lembang. Acara dimimitian jam 10 isuk-isuk.
Alhamdulillah, baraya nu daratang mah salain ti Bandung oge aya nu ti
luar kota. Malah aya nu ngahaja ngajugjug ti Solo, Jawa Tengah. Tah,
kusabab penceramahna ngadadak ngabolaykeun alatan aya kaperluan
ngadadak, nya ahirna mah Komandan Hansip jadi penceramah. Acara
pangajian teh rengse waktu ngong adan lohor. Beres sarolat mah, tuluy we
acara ramah tamah jeung balakecrakan. Biasa, acara pangajian ieu dieusi
oge ku silih pikawanoh alias kenalan papada baraya. Utamana nu karek
miluan tepung lawung. Hal ieu dumasar kana prinsip di Banyolan Sunda:
"Nu can wanoh jadi wanoh, nu geus wanoh jadi dulur."
Sarengsena
soliskan mah, acara dituluykeun kana ngabahas kagiatan Sunda Binangkit
nu rek diayakeun poe Minggu, 9 Februari 2014. Ieu minangka laporan jeung
evaluasi ti panitia. Sakalian nangtukeun rengrengan kapanitiaan nu
anyar gabung minangka jadi sukarelawan. Rengse ngabahas acara Sunda
Binangkit, dituluykeun kana sawala ngeunaan arah pemberdayaan usaha
jeung bakti sosial nu dikokolakeun ku baraya. Salah sahijina, nyaeta
nyieun koperasi nu modalna babarengan ti baraya. Kitu oge diberdayakeun
marketing usaha baraya kalayan sistem reseller ti unggal baraya Banyolan
Sunda. Hal ieu istilahna mah pikeun ngahirupkeun ekonomi baraya. Tah,
rengse diskusi mah tuluy we nongton bareng pertandingan Persib.
Sanajan
awalna wanoh tina gogonjakan, tapi ari geus tepung lawung mah bisa
diarahkeun pikeun ngaberdayakeun potensi babarengan. Lian ti eta, dina
kagiatan pangajian saterusna mah baraya ngarencanakeun diayakeun oge
pelatihan pikeun sagala hal nu aya patalina jeung pemberdayaan,
kayaning: diajar ngokolakeun usaha online; diajar nyieun blog;
ngokolakeun modal pinjaman ti koperasi Mitra Baraya; ngarencanakeun
bakti sosial; diajar nyieun kagiatan/event organizer; diajar basa Sunda;
nepi kumaha cara nulis nu merenah. Pikeun pelatihan ieu, pangeusi
materi ngamangpaatkeun baraya nu memang boga kaahlian dina tema nu
dibahas oge gawe bareng jeung pihak di luar Banyolan Sunda.
Kagiatan-kagitan
nu dilaksanakeun ku Banyolan Sunda memang lain pangajian wungkul. Ka
hareupna potensi-potensi teh dikaryakeun babarengan. Misalna, dibentuk
rengrengan pikeun redaksi Majalah Banyolan Sunda. Ieu majalah teh
salain keur media carita-carita humor oge pikeun promosi usaha nu
dikokolakeun ku baraya. Kitu oge dina sistem penjualan majalah
diberdayakeun oge baraya sangkan jadi agen. Itung-itungan komisi keur nu
ngajual majalah mah tetep dipake kalayan profesional. Hal ieu minangka
salah sahiji tarekah pikeun "mancing" baraya nu rek diajar ngahasilkeun
bahan pikeun dapur tetep ngebul. Jadi, pola kahartos tur karaos
di Banyolan Sunda dilaksanakeun taya lian yen ngaranna humor/banyol mah
ngan media pangraket. Ari kadituna mah, tali mimitran nu geus kabentuk
di Banyolan Sunda bisa diberdayakeun kalayan azas mangpaat babarengan.
Baraya nu minat gabung sareng Banyolan Sunda, mangga tiasa kontak ka
admin/pupuhu di Group Facebook Banyolan Sunda.
Follow:
