Cak Gu Rancabanyol
Wilujeng siang. Nuju teu ngawulang, Pa?
Wilujeng siang. Naon atuh Sarbah wayah kieu geus tatanya. Panan ieur keur istirahat sakola. Kuring ge reureuh heula. Nungguan tukang cilok can datang wae.
Batur mah di ruang guru, naon ieu mah istirahat teh di ruang UKS?
Hoream. Ieu keur neangan minyak angin. Asup angin ieu teh. Kamari make motor ka sakola ngan make kaos sangsang.
Naha sepi kieu sakola teh?
Panan barudak keur istirahat. Lieur di dieu mah da. Mun lonceng istirahat disada, barudak teh ngaber ka ditu ka dieu. Engke baralikna teh Ashar.
Edun. Na aya ku kitu eta barudak teh? Paingan jiga nu jangar jadi guru SD Inpres Rancabanyol mah?
Puguh. Baredegong jeung jarailna menta ampun. Maenya tadi korsi guru dipindahkeun kana suhunan. Kapaksa kuring isuk-isuk kudu naek kana suhunan.
Beu! Saha eta nu pangbandelna?
Lain bandel, geus buraong. Eta we barudak Genk Ulated, sabangsa si Sekdes, Si Suhe, Suhaemi, si Epul, jeung si Saodah, aya ku liwar kalakuanna teh. Bejana mah baheulana teu kungsi divaksin ka Posyandu.
Naha atuh masih betah ngajar di dieu?
Pangab tuda Bah. Pangabutuh. Disabar-sabar we. Baheula pernah menta dimutasi. Ngan edas tah Kepala Sekolah Nyimas Kanjeng Ratu Yuyu mah. Kuring rek dimutasi ka Papua. Atuh jauh ka anak-pamajikan.
Lain ieu teh, naha bet dingaranan Cak Gu?
Eta gara-gara Upin-Ipin. Panan mun keur Bu Guru asup sok raeng: Selamat pagi Cik Gu! Kusabab kuring mah lalaki, dingaranan Cak Gu.
Nepi ka kitu nya? Ari barudak sok tawuran di dieu?
Alhamdulillah tara. Ngan sok silih teluh paling ge. Kamari ge panan dirazia dina kantongna aya nu mawa arit, bedog, nepi ka kampak.
Euleuh! Terus kumaha?
Teu dikukumaha!
Naha? Panan eta senjata tajam? Bisi dipake tawuran. Der engke jiga na TV, pelajar jadi pembunuh.
Eh, da balageur dina urusan eta mah. Mawa bedog jiga si Titin, kumeh we balikna sok titah ngala suluh ku bapana. Nu nawa arit jiga si Suhe, panan di imahna boga domba. Balik sakola manggul jukut. Ari nu mawa kampak jiga si Sarben... panan manehna mah sapopoena tukang nuaran tangkal. Sakali nuar meunang buruh lima rebu perak.
Lamun samenan sok rame di dieu, Pa?
Rame. Unggal samen sok nanggap anjing edan sapuluh. Diaburkeun ka nu keur lalajo panggung.
Ari bullying mah tara aya atuh nya?
Tara, balageur di dieu mah. Budak kelas 5 tara nyiksa kelas 2 atawa kelas lainna. Ngan eta sok bullying teh ngan ka kuring we. Ka guru lain mah tara. Teuing aya dendam naon? Rarasaan mah tara galak da. Can pernah kudu nyepret atawa ngajewer ceuli budak.
Cenah ceuk Si Sarben mah kumeh Bapa sok mere peunteun 5 wae ka barudak?
Teuing tah mun eta mah. Da kuring mah resep pisan kana angka lima teh! Ngefans ti baheula. Boga anak ge panan lima... domba lima, pamajikan....euh boga...!
Lima?
Lain siah. Lalawora nya. Tujuh nyaho!
Follow:
