Odah Riweuh (Nyai Wara-Wiri)

Dah, keur naon?
Biasa Bah...keur mikir.

Mikir naon deui?
Mikiran kumaha carana Jokowi bet bisa jadi Gubernur Jakarta?

Lain ngaran teh bet gunta-ganti wae.
Ih ari si Abah, di FB mah da euweuh nu nyaram ieuh. Euweuh catatan sipil. Tong boroning Hansip gejul si Sarben.... Dewan Keamanan PBB ge moal bisa nyarek Odah ngaganti ngaran atawa nyieun akun anyar ge.

Eta nyieun e-KTP geus beres ka Lurah?
Hese Bah. Ditolak wae. Teu pira eta na status di KTP hayang diganti: Menjalin hubungan... aya ku hese. Dasar Lurah mah hese disogok ge. Ngadon nyiwit. Teu pira disogok ku gantar.

Na ari Odah sok kuma karep hirup teh. Lain sok narima curhat ti baraya?
Eureun ah. Niat jadi Mama Loren gagal, nyoba jadi Mamah Dedeh gagal...

Geus we atuh jadi Mama Lemon.
Sok, Abah nu dikumbahna ku kuring!

Odah mah cenah ceuk beja meunang jodo anyar di Rancabanyol?
Hahahaha.... kacow Bah. Teu pira kamari meuli Ale-ale. Kan sok aya hadiahan nu digesek. Tah pas digesek, batur mah meunang Ale-Ale haratis deui atawa meunang duit. Ari uing mah kalahkah meunang...

Meunang naon?
Eta na tulisanna: Selamat Anda Mendapatkan Sekdes! Can ditukeurkeun ka warung. Sieun ah, si Sekdes apal sorangan ngungudagna ke aku teh.

Bogoheun?
Lain, ngungudag bari mawa tumbak!

Heueuh da moro bagong! Cik atuh jadi awewe teh sing rada feminim. Ieu mah tuda talajak jiga jalu pisan.
Maklum Bah kuring mah ti leuleutik resep pisan ulin jeung lalaki. Jadi geus gede kababawa jiga kieu, tomboy mun ceuk Nyi Iroh mah. Jeung eta tong ngomongkeun wae si Sekdes. Apanan uing geus boga salaki matuh!

Aeh, enya. Panan di dinya teh boga anak kembar nya?
Enya. Kembarna awewe. Alhamdulillah, boga anak kembar.  Beli satu dapet dua... eh, ngajuru sakali kaluar dua.

Alus eta anugerah ti Gusti.
Enya Bah. Batur mah hayang boga anak kembar teh hese. Rek copy-paste ge moal bisa, da eta mah mung tiasa didamel ku Gusti. Teu jiga Camat!

Har, naha jadi ka Camat?
Cenah Camat mah cita-cita hayang boga pamajikan kembar!

Beu! Ngawayuh atuh eta mah. Moal daek Camat mah ngawayuh... lalaki satia.
Satia naon, kamari ge ngaheureuyan Odah. Manehna ngiriman SMS ka Odah sababaraha kali.

Naon cenah eusi SMS-na?
Eusina? Dah, cik pangneangankeun deui lah calon pipamajikaneun anyar. 

Terus ku Odah dibales naon SMS-na?
Ku Odah dibales: Naon Ki Camat hayang kawin deui? Hayang digempur ku kunti ti beulah wetan atawa ti beulah kulon? Kabeneran Odah nu nyepeng kadua wilayah eta mah. Camat langsung teu ngabales. Kamari panggih langsung menta hampura moal sakali-kali deui cenah boga niat kawin jeung awewe. Rek kawin jeung tangkal randu we.

Hade pisan tah Odah mah bela pisan ka kaom sorangan teh. Ari Odah ayeuna sibuk naon wae?
Ah, Odah mah keur sibuk latihan cat walk we.

Maksudna, jadi peragawati?
Ari si Abah cat teh 'ucing' walk teh 'berjalan'. Jadi Odah keur resep ningalikeun ucing leumpang. Sugan we eta ucing teh leumpang... terus neangan pasanganna. Resep Odah mah ningali ucing kawin teh!

Ampuun. Rek iraha cageurna maneh teh Odah?
Engke mun Abah awakna geus jiga awak Morgan Sm*sh... Odah rek niat cageur ngacaprukna!

Jauh ka langit Dah uing awak sarua jeung Morgan mah. Paling deukeut awak jiga sasampayan.
Enya... sagala nyampay na awak Abah mah.. ti kutang nepi ka kolor aki-aki.

Meunggeus ah! Lieur!
Matakna tong loba ngadahar hamster geura. Sok puputeran di jero beuteung, jadi lieur kana sirah! Komplikasi eta teh Bah!

Follow: