Buku "Banyolan Sunda (Carita ti Kampung Rancabanyol)

Ngadegna Komunitas Banyolan Sunda 9 Pebruari 2009 nepi ka ayeuna jadi hiji catetan yen komunitas ieu masih eksis boh di dunya maya oge di dunya nyata. Rebuan carita humor Sunda geus dijieun ku baraya, utamana di Facebook. Pon kitu oge carita Banyolan Sunda nu khusus dijieun ku "kuncen" Banyolan Sunda, nyaeta Abah Amin geus kadokumentasikeun ti taun 2004 nepi taun 2007 mimiti sumebar di dunya maya (di blog jeung komunitas-komunitas online) nepi taun 2009 carita-carita humor basa Sunda ngarambah oge ka media Facebook. Sawareh malah aya nu diterbitkeun di Majalah humor Sunda Cakakak.

Taun 2012 dina bulan Mei, buku Banyolan Sunda (Carita ti Kampung Rancabanyol) bisa medal kalayan dikaluarkeun ku Penerbit Mitra Baraya. Buku ieu dirojong ku baraya nu aya di Komunitas Banyolan Sunda ti mimiti waragad nepi ka distribusi di unggal daerah nepi ka mancanagara. Medalna buku ieu salah sahiji kasang tukangnya nyaeta supaya carita-carita nu ditulis ku Abah Amin bisa kadokumentasikeun kalaya formal kalayan ayana bandera penerbit nu dikokolakeun jaringan Banyolan Sunda sorangan. Lain kunanaon, da geuning salila ieu loba carita meunang nulis Abah Amin nu sumebar di internet kalayan copy-paste ti website ieu. Malahan mah aya sabagean nu kungsi dipake dina acara humor Sunda nu maneuh di salah sahiji radio swasta di Kota Bandung. Eta meureun ku ayana anggapan yen carita humor nu aya di internet mah sok dianggap "milik bersama", padahal carita-carita meunang Abah Amin lolobana meunang mikir sorangan jeung mibanda ciri khusus (salah sahijina make tokoh-tokoh virtual warga Rancabanyol). Matakna carita humor ti Abah Amin mah sok beda jeung carita nu ilahar aya di internet nu remen copy-paste.

Alhamdulillah, respon masarakat nu mikaresep carita dina buku Banyolan Sunda (Carita ti Kampung Rancabanyol) kaitung rea. Buktina, can sabulan buku ieu oplahna geus nepi sarebu leuwih. Lolobana nu pesen online ti unggal wewengkon. Geus puguh ari nu mareuli ti baraya Banyolan Sunda sorangan mah. Ieu jadi tanda yen baraya Banyolan Sunda teh masih keneh resep maca tulisan dina media citak, salain sok maraca di internet. Insya Allah, ka hareupna mah buku nu medal ti Banyolan Sunda lain ngan karya Abah Amin wungkul, tulisan-tulisan humor karya baraya Banyolan Sunda ge bisa diterbitkeun dina buku kompilasi/kumpulan humor baraya. Tema bukuna oge bisa wae lain ngan saukur carita fiksi wungkul, tapi bisa oge pangalaman lucu ti baraya atawa tema-tema sejenna.

Kontak pesen buku:

SMS: 0817 2345 754
Pangaos: Rp. 35.000,-
(tos kalebet ongkos kintun via JNE)