Lebu "Merapi"

Kamari mah dina berita dina koran jeung televisi cenah lebu Merapi geus nepi ka Bandung. Kuring ge asa teu percaya, panan jauh Merapi ka Bandung teh. Berarti bener, memang eta bituna Gunung Merapi teh pohara dahsyatnya... bila dibandingkan dengan senyumanmu membuat aku.... jatuh bangun. (Aeh, naha jadi kana Meggy Z. ieu teh). Malahan cenah geus nepi ka Sukabumi sagala.

Ciri lebu nu turun ti langit teh memang teu katara pisan. Ngan eta, lebu silika anu lamun asup kana awak urang bakal ngalantarankeun gangguan pernapasan. Atuh urang kudu siap sadia make masker. Nya, kudu make masker... panan lebuna ge ti Jawa. Naha? Da lamun make Kang Ker mah asa teu ngeunaheun. Komo Abang Ker mah!

Tadi beurang kuring numpak motor. Bener we sajajalan asa aya nu narapel kana jaket teh. Atuh kaca helm nu biasa dibuka ge, kapaksa ditutup deui... da eungap. Ngan aneh, asa naker pisan ieu lebu teh. Sieun ieu beungeut dempak teh jadi mehong. Kuring tadina mah hayang mengkol ka apotek, niat rek meuli masker. Tapi, kuring nyidik-nyidik di hareup. Beu! Rek teu loba kekebul kumaha atuh da di hareupeun, geuning sim kuring teh nuturkeun treuk pasir! Kabeneran meureun eta treuk teh geus ngiangkeun pasir ka toko bangunan. Panan sok garing ari balikna mah. Puguh, jaba eta treuk teh ngebut deuih... kekebulna haliber keuna ka awak kuring.

Kieu yeuh, mun ceuk barudak ayeuna mah keuna ku: parno... alias paranoid ku lebu Merapi.
© Abah Amin

Follow: