Masalahna Naon Nya?
Istrina rerencangan tos sasasih ieu sipatna janten robih pisan. Sering tetelepon bari haharewosan. Mun ditaros ti saha teh, sok langsung ditutup teleponna. Nyariosna ti rerencangan kantor atawa nu salah sambung. Teras ahir-ahir ieu uih ti kantorna sok wengi wae, mun ditaros nyebatkeuna teh lembur da aya proyek di kantorna. Tapi pas dicek slip gaji, teu aya catetan lemburna. Sareng ayeuna teh password HP sareng facebookna digentos. Teras, HP-na sok dicacandak kamana wae, malihan ka wc oge sok dicandak.
Kumargi curiga, nya rerencangan abdi teh nepangan bosna. Bosna justru nerangkeun perusahaan nuju sepi order, sareng teu pernah deui aya karyawan nu lembur.Pas istri rerencangan abdi eta nyarios bade aya meeting sareng rekan bisnis perusahaan dina dinten Minggu.
Akhirna rerencangan abdi teh panasaran hoyong nuturkeun dugika nambut motor, jaket, sareng helm supados istrina teu apal nuju dituturkeun. Pas mobil istrina liren di parkiran mall. rerencangan teh buru-buru mareuman mesin motorna supados teu kadangueun kumargi knalpotna gandeng. Teu lami ti dinya.. aya hiji pameget nyampeurkeun ka mobil istrina, teras si istrina teh ngalih kanu mobil pameget eta. Atuh tambih curiga wae rerencangan teh ningal kitumah.. Tah, basa mobil lalaki eta bade maju deui, rerencangan abdi teh buru-buru we nyelah motorna bade nuturkeun mobil eta. Ngan eta, tos diselah sababaraha kali ge, angger eta motor teh teu tiasa hirup wae.
Tah ayeuna anu bade ditaroskeun ku abdi teh nyaeta, kinten-kinten masalahna teh aya dina naon? Naha dina busi? Karburator? CDI ? Akina tos soak? Atanapi naon dugi motorna teu tiasa hirup deui?
Kintunan: É-Nét, Baraya Banyolan Sunda
Follow:
