Catetan Milangkala Banyolan Sunda Ka-3
Satadina mah acara mieling ngadegna group Banyolan Sunda nu ka-3 ieu moal direuah-reuah. Cukup we ngan sababaraha urang baraya nu dumuk di Bandung. Malah persiapanna ge kawilang ngan sababaraha minggu. Nya kitu tea, ari ngaranna tos asa ka dulur mah, baraya ti luar Bandung loba nu rek ngahadiran ieu acara. Kapaksa "quota" peserta ditambahan. Alhamdulillah, acara milangkala Banyolan Sunda nu nincak umur 3 taun ieu dihadiran ku baraya nu masih keneh boga kareueus kana niat duduluran ngaliwatan media gogonjakan. Acara milangkala Banyolan Sunda diayakeun poe Minggu - 12 Pebruari 2012, di RM Ampera Jln. Rancabolang, Bandung.
Sapanjang lengkah komunitas heureuy Sunda nu nepi ka umur 3 taun ieu, rea jalan nu kasorang kalayan rupa-rupa kaayaan. Mun nyorang katukang BS mimiti ngadeg, taun ka taun teh mibanda ciri jeung kajadian nu kalakonan ku baraya. BS diadegkeun ngan saukur media, nu mere warna kana ieu komunitas taya lian iwal nu ngeusina. Lamun ningali kanyataan, aya istilah: tong boroning ngurus jelema di dunya maya, di dunya nyata ge...beda sirah, beda kahayang. Komo dunya maya nu kaasup wanoh virtual, dina hal ieu wanoh ngan saukur ngareka-reka, teu pati apal kumaha latar belakang baraya. Ngan "bekel" info ngaran landihan, foto, padumukan, profesi, oge info nu can tangtu bener. Kaasup teu apal sikep jeung watakna, nepi ka naon misina ngan saukur wangwangan. Tapi ku niat hayang ngaitkeun tali babarayaan mah, geuning rea keneh (malah beuki nambahan) baraya nu hayang aub di Banyolan Sunda alias jadi Warga Rancabanyol tea. Komo kadieunakeun loba tarekah jeung usulan ti baraya nu boga niat yen BS teh lain ngan saukur tempat gogonjakan, tapi mibanda misi jeung visi pikeun ngaronjatkeun potensi urang Sunda.
Alhamdulillah, hal ieu geus mimiti meletek. Aya baraya nu ngabantu nyieun akteu CV pikeun ngembangkeun usaha-usaha nu dilakonan ku baraya nepi ka ngajieun hiji media broadcast radio streaming online. Ieu keur kuring pribadi (Abah Amin) salaku nu boga ideu ngadegkeun BS asa reueus ku tarekah baraya nu kalintang kudu diapresiasi. Pola paheuyeuk-heuyeuk leungeun jeung ngarasa asa geus dulur teh beuki deui beuki karasa. Malahan mah, ayeuna aya kamajuan dina masalah jodo oge. Aya hiji-dua baraya nu meunangkeun jodo tina aubna di Banyolan Sunda. Ari sim kuring mah, sanajan sok disebut Kuncen Rancabanyol, ngan saukur nganteur karesep ngabanyol wungkul di Banyolan Sunda teh. Ari geus jadi hiji jumplukan/komunitas mah, Banyolan Sunda geus leupas tina nu ngaranna Kuncen. Hartina, ieu geus mibanda ciri sacara utuh atawa geus jadi ciri khusus komunitas. Tah, nu matak bijil ciri eta taya lian iwal ti baraya sorangan nu mangtaun-taun ngaraketkeun tali silaturahmi kalayan intens. Jadi, ayeuna mah kasawang yen aub di Banyolan Sunda mah ulah aya pikiran naon-naon, estu ngan niat babarayaan. Ari ngaran paketrok dina wawanohan mah hal nu biasa. Ngan meureun ka hareupna pikeun urang leuwih maju, lain ngan saukur ngagugulung prasangka sorangan. Anu antukna leuwih milih ngajauhan ieu potensi nu sabenerna bisa mere kamajuan keur urang.
Meureun, najan aya hiji-dua baraya nu tilem salila BS ngadeg nepi ka tilu taun ayeuna, eta mah dianggap romantika hiji komunitas we. Da meureun oge aya nu teu bisa intens ngahiji deui teh kusabab kasibukan atawa memang aya hal lainna. Tapi, ningali kaayaan ayeuna, BS beuki nambahan warga anyar nu sok kopi darat eta jadi ciri yen BS mah tetep kabuka pikeun jadi media wawanohan papada baraya. Contona mun balik deui kana perkembangan BS, salah sahijina ayeuna geus ngadeg Radio Baraya Sunda (streaming online), baraya kalayan sabilulungan ngamajukeun ieu radio online. Najan mimitina mah ngan saukur iseng, ngan niat hayang ngawanohkeun Ki Sunda ka dunya global. Tapi respon ti baraya lain geuning teu sangka, kaum dangu terus nambahan, malah aya nu jadi donatur jeung sponsor sagala. Mun ningali awalna mah, ieu radio mimitina tina blog jeung server radio nu haratisan. Ayeuna geus boga alamat webs, domain, jeung hosting sorangan. Oge nu ngarespon ku ngadegna ieu radio lain ecek-ecek, ti inohong, seniman, katut birokrat Sunda oge milu ngarojong. Malahna baraya di mancanagara, samodel Kang Dhany nu dumuk di Jepang, mantuan nyieun aplikasi RBS nu khusus dipasang di iPhone (Apple).
Ayeuna mah kari urang-urangna nu ngeusi ieu lembur Rancabanyol, kumaha ka hareupna ngokolakeun potensi nu aya di urang Sunda? Anggota mah rea, najan kasebut "massa mengambang" ge tapi bisa digeroh pikeun kamajuan urang salaku Sunda. Ayeuna malah geus mulai baraya BS nu resep kana bisnis mah geus nyieun komunitas mandiri di BS. Maranehna intens komunikasi pikeun ngembangkeun usaha/bisnis sewang-sewangan kalayan silih informasikeun dina acara kopi darat atawa komunikasi di media virtual (FB, BBM, jsb.). Ieu bisa jadi wadah pikeun ngarubah stigma yen cenah urang Sunda mah hese diajak usaha atawa susah diajak daria (serieus). Geuning tina heureuy- gogonjakan ge bisa! Kumaha niat wae eta mah. Nu penting ayeuna, hayu urang salaku urang Sunda mulai tos bisa muka diri. Najan awal wawanohan ti dunya maya, tapi bisa digeroh di alam nyata. Lain hal nu teu mungkin!
Atuh, sim kuring salaku pribadi oge ngawakilan pupuhu-pupuhu di Rancabanyol seja ngahaturkeun hapunten nu kasuhun. Bilih salami ngadegna BS teh seueur kalepatan, nu dihaja atanapi teu dihaja, panginten urang sami-sami nuju ngalakonan diajar kanggo langkung ngawanohkeun saha baraya, oge saha diri urang nu saleresna. Ku proses ngadegna BS dugi ka tilu taun ieu, mugia aya gambaran kumaha urang pikapayuneun kanggo ngokolakeun diri dina ieu komunitas. Sakali deui, hayu urang paheuyeuk-heuyeuk leungeun ku niat babarayaan salaku dulur nu mimiti wanoh di alam maya. Mugia ka payunna BS sing nanjeur ku pangeusina nu langkung mibanda kuantitas tur kualitas nu aya mangpaatna kanggo kamajengan: Ki Sunda!Follow:
