Halal Bihalal Warga Rancabanyol (25/9/2011)
Minggu, 25 September 2011 di bumi Pa Camat Rancabanyol (Jayagiri - Lembang) ngadadak rame ku jul-jolna baraya ti unggal wewengkon, aya nu sumping ti Jakarta, Bogor, Cikarang, Cikampek, Sukabumi, Sumedang, dugi nu sumping pangtebihna ti.... Cigondewah. Alhamdulillah, acara halal bihalal nu diayakeun dina raraga silaturahmi Warga Rancabanyol ba'da ngalaksanakeun ibadah di bulan Ramadhan 1432 H ieu tiasa nambih ngaraketkeun tali silaturahmi papada baraya Banyolan Sunda. Kagiatan nu sok rutin diayakeun unggal taun ieu minangka ajang tepung lawung baraya nu salami ieu aktif di Banyolan Sunda. Baraya nu sumping ti benten-benten padumukan, profesi, yuswa, jsb. tiasa aub dina hiji riungan kalayan niat nambih baraya. Baraya nu hadir sanes wae nu tos biasa tepang di alam nyata, namung langkung nambihan oge geuning warga-warga anyarna.
Acara ieu memang dikhususkeun kanggo baraya Banyolan Sunda nu kalebet Warga Rancabanyol, baraya nu memang niat hoyong langkung silih pikawanoh di darat. Dina acara sapertos kieu biasana dieusi ku kagiatan silih ngenalkeun diri masing-masing sareng ngabahas sabudeureun kaayaan di Rancabanyol. Dina acara sapertos kieu, baraya nu panasaran ka Rancabanyol bakal tiasa langkung wanoh kumaha saleresna group Banyolan Sunda sareng saha wae pupuhu/baraya nu salami ieu icikibung di Rancabanyol. Insya Allah, ka payunna mah urang ayakeun deui tepung lawung (kopi darat) akbar nu pesertana teu kawengku sanes wae pupuhu Banyolan Sunda.
Di handap ieu sababaraha dokumentasi foto kagiatan Halal Bihalal Warga Rancabanyol 2011:
Follow:
