Supatra Sasuphan: Manusa Paling Loba Buluan
Guinness World Record taun ieu nyatet hiji rekor anyar yen Supatra Sasuphan kaasup Manusa Paling Loba Buluan di Dunya. Budak awewe umur 11 taun ieu mun ditengetan mah katingal kawas serigala, sabab awakna (utamana bengeutna) pinuh ku bulu nu paranjang. Supatra Sasuphan teh saurang siswi di Ratchabophit Bangkok. Manehna ayeuna jadi populer di sakolana alatan ngaranna geus asup catetan Guinness World Record.
Najan kaayaan kitu, Supatra ngarasa gumbira. Da cenah batur mah asup Guinness World Record kudu ngalakonan sagala usaha nu aneh tur beurat pikeun asup ka dinya, misalna manusa nu bisa narik mobil treuk badag. Supatra Sasuphan teh kaasup salah sahiji ti 50 urang di dunya ieu nu beunang ku Ambras Syndrome. Ieu sindrom teh disababkeun ku kromosom anu ruksak. Sindrom ieu mimiti kapanggih awal Abad Pertengahan. Samemeh panyakit eta ditalungtik tur dipikanyaho ku ilmuwan, nu katerap ku panyakit model kieu teh sok dilandian: werewolves atawa 'Manusa Serigala'.
Supatra Sasuphan ngabogaan bulu kandel anu tumuwuh di bagean beungeut, ceuli, lengan, suku sarta tonggongna. Malahan, make perawatan laser ge gagal ngeureunkeun tumuwuhna buuk dina awak Supatra. Malah, beres dilaser eta bulu teh kalahkah beuki nambahan. Ngan untungna, Suparta mah teu dijarauhan ku babaturanana. Manehna bisa gaul ulin jeung babaturanna. Manehna najan bisa kasebut aneh, lalaunan bisa ditarima ku masarakat. Supatra oge ngaku yen sakapeung manehna hese nempo lamun bulu anu tumuwuh di beungeutna geus panjang.
Dina loba hal, Supatra Sasuphan sarua kawas barudak saumuranna. Manehna resep ngojay, diajar tari bari ngaregepkeun musik favoritna sarta ulin jeung babaturanana. Salain ti eta, Supatra Sasuphan ge resep lalajo TV di imahna di Pranakom, wewengkon pasisian Bangkok. Karesna teh lalajo film kartun. Supatra cicing di imahna bareng jeung lanceuk awewena, Sukanya (15 taun), bapana Sammrueng, sarta indungna Somphon. Manehna boga cita-cita hayang jadi dokter supaya bisa mantuan pasen.
Nurutkeun katerangan indungna, waktu lahir, Supatra kudu ngajalanan dua operasi pikeun bisa napas. Ceuk bapana, Suparta kasebut henteu sehat waktu keur orok, alatan irungna ngan hiji milimeter rubakna. Nepi umur tilu bulan, Suparta aya di jero inkubator pikeun mantuan pernapasanna. Suparta dirawat di rumah sakit aya kana sapuluh bulanna. Sammrueng pohara salempang ningali kaayaanana.
Supatra Sasuphan ngajalanan operasi lainna waktu manehna umur dua taun sarta ayeuna manehna bisa ngarenghap kalayan normal. Tapi waktu Sammrueng sarta pamajikanana, Somphon, 38 taun, mawa Supatra ka imah, maranehanana nyanghareupan leuwih loba masalah.
Waktu tatanggana mimiti nempo kaayaan Suparta, maranehanana nanyakeun naon dosa anu geus ku Sammrueng jeung pamajikanna dipigawe. Sammrueng tambah salempang sabab waktu Suparta geus manjing ka gede, barudak lain sok sering ngalelewe. Ngan untungna Suparta mah sabar jeung someah ka batur. Manehna bisa ditarima ku komunitasna. Beuki kadieunakeun, aya hal nu lain oge tumiba ka Suparta, huntuna tumuwuh lalaunan sarta manehna henteu bisa nempo kalayan normal. Bulu Supatra terus tumuwuh, indungna kudu nyukur bulu Suparta sacara rutin. Malah mun kuramas, Supatra sok ngagunakeun sampo orok, alatan manehna alergi mun make sampo dewasa.
Follow:
