Tertibkeun Imajinasi!
Jaman beuki kolot teh mibanda ciri nu araheng. Salah sahijina, papakean kaom coet alias para wanoja... beuki kabeakeun bahan. Ayeuna mah lain ditutup dibuni-buni, kalahkah ngahaja jiga nu hayang katangar ku batur. Pikeun nu makena mah meureun sugema da bisa mere "hiburan sesaat" ka batur. Tapi ari keur kaom "penikmat" (kaom mutu) kadang sok matak ngaburantakkeun imajinasi. Jiga pangalaman kuring sababaraha waktu ka tukang.
Harita kabeneran liwat di jalan hareupeun Unpas cabang Lengkong. Pas di stopan Jln. Pungkur nu arah ka Ciateul-Pungkur, lampu stopan pindah kana beureum, kuring ngarandeg di tukangeun treuk engkel. Teu lila ti tukang aya motor dua sarua ngerem. Nu make motor kahiji mah saurang wanoja... eureun di gigireun pisan. Tah, nu kana motor hiji deui mah kabeneran bapa-bapa. Ngan eta si bapa ngerem teh teuing kurang itungan atawa telat nincak rem... jug gubraaaag! Manehna nyenggol juru-tukang treuk.
Kuring rikat mantuan si Bapa nangtungkeun motor katut manehna. Si bapa katindihan motorna sorangan. Tuluy dibawa ka sisi jalan.
"Teu nanaon Pa?" tanya kuring.
"Henteu Jang. Ngan reuwas we... jeung ieu pingping seueul katindihan!" jawab si Bapa bari nyengir nahan kanyeri.
"Kunaon atuh Bapa teh. Abdi ge reuwas. Telat ngerem nya Pa? Atawa remna tos teu pakem?" kuring nanya deui. Si Bapa ngahuleng bari melong ka si Eneng nu cuek bebek jiga euweuh kajadian nanaon.
"Hehehehe... tong ribut nya. Bapa teh sabenerna anteng teuing, ti tadi pan patutur-tutur jeung si Eneng itu nu make motor matic. Meni ngolenyay tuda eta pingping!" ceuk si Bapa semu ngaharewos, "sadar-sadar geuning geus dina stopan... awahing ku maok reret ka si Eneng! Ari pek di hareup aya treuk. Kieu balukarna!"
Beu! Akibat pingping ngoleyay... si Bapa ayeuna malik mencetan pingping sorangan bari nahan kanyeri. Waktu lampu hejo... eta si Eneng mah ngalajengkeun deui perjalananna. ka arah Ciateul Bangun taya rasa "dosa" geus ngabalukarkeun batur nambru. Ngan eta... geus nyaho aya nu korban nepi ka nambru ge... sababaraha kaom mutu nu sarua eureun, aya we nu maok reret ka si Eneng kolenyay. Hayang nambru oge kitu? Teuing di stopan mana deui tah korban berjatuhan, pilihlah salah satu jawaban yang dianggap benar berikut ini:
a. stopan rek ka ITC Kebon Kalapa
b. stopan Moh. Toha (PT Inti)
c. stopan Tegallega - Pelindung Hewan
d. stopan Moh. Toha - By Pass (Soekarno-Hatta)
Follow:
