Lebaran di Rancabanyol 1

Kebeneran nu jadi khotib di salat Ied teh Ustad Asek. Teuing pedah Idul Fitri ayeuna mah pas meneran poe Jumaah, da eta keukeuh salah wae:

"Hadirin sidang Jum'ah nu dipihormat ku simkuring....".
Kang Mulyana nu diuk di shaf hareup langsung mere ralat bari ngaharewos:

"Lebaran euy!"
"Aeh, muhun. Punten. Hadirin jamaah salat ied nu dipihormat ku simkuring sareng dimulyakeun ku Allah Swt. ....."

Nya singket carita mah beres wae. Pas nyebutkeun akhirul kalam teh, kabeh jamaah langsung nangtung. Ngan eta, Kang Roens... meureun balas peuting begadang takbiran di masjid, jadi kabawa tunduh. Manehna lelenggutan basa khotib ceramah teh. Antukna, pas beres ceramah, manehna nangtung... ngan suku singsireumeun. Karek ge jung nangtung, na atuh awakna ngarampeol nabrak nu keur baris. Nu kadupak teh Sekdes. Sekdes mah karek ge nyolempangkeun sorban, reuwas diteumbrag ku Kang Roens.

"Aduh Gusti..." Bluk! Sekdes nabrak Jang Ipan. Jang Ipan sarua reuwas, awakna ngabangkieung nubruk Mang Ndien. Mang Ndien nubruk Jang Epul. Tuluy jiga epek gapleh alias epek domina. Nepi ka kabeh nu keur baris rek sasalaman teh nambru! Ahirna, geus maranehna nangtung... sasalaman dilakukeun putaran kadua alias diulang (beuh, jiga Pemilukada wae).

Ari di barisan ibu-ibu di tukang mah lumayan rada ayem. Ngan eta keur sasalaman ge angger wae ngomongkeun dahareun jeung bisnis kueh.
"Aceuk.... engke wae abdi ka bumi nya. Hilap sesa kueh teu acan dianteurkeun," ceuk Teh Elly bari menerkeun mukena nu nutupan rarayna.
"Eh, abdi oge hilap. Kamari tilas arisan kueh teu acan nya?" tanya Neng Achy ka Teh Resti.
"Ke...ke... ari sendal abdi kamana? Euleuh, mangkaning eta sendal anyar," Nyimas Yuyu hariweusweus da eta sendal Crocks kameumeut ngadadak leungit. Teu lila....
"Mamah! Ieu ku abdi disumputkeun kana jero bedug!" ceuk Jang Primer nyampeurkeun indungna.
"Euh, ilaing mah ngareureuwas wae nya. Hampura Ema nya!" ceuk Nyimas bari mikeun dampal leungeun.
"Mmm... si Mamah mah. Abdi atuh nu kedah nyuhunkeun hapunten!" celemot eta budak teh nyium dampal leungeun indungna. Nyimas aya ku reueus. Ngan anggeunsa matak manyun:
"Na ari ilaing jiga budak we.... eta urut es krim jadi rametek kana leungeun Mamah!" © Abah Amin

Follow: