Tepang Sono Baraya Banyolan Sunda di Betawi
Poe Senen, 17 Mei 2010. Tadina mah, datang ka Betawi teh ngan niat hayang tepung jeung ki sobat di Banyolan Sunda (BS), Sekdes Rancabanyol, sakalian rek mikeun pesenan kaos BS. Datang ka tempat gawena di daerah Senayan, Jakpus. Kabeneran manehna karek balik gawe. Ngan eta tuda, hirup mah jiga sambel... teu rame lamun teu didadak teh. Nya Sekdes Rancabanyol langsung we "dibajak". Kabeneran deuih manehna bisa nyupiran. Antukna, manehna dititah nyetiran mobil ka daerah Kelapa Gading. Teuing ku dipaksa manehna teh ... teuing ku memang bener hayang panggih jeung baraya BS sejenna -nu ngadadak diteleponan sina kumpul. Da eta mah, Sekdes nyupiran ngadadak bageur. Aya nini-nini di sisi jalan ge meni teu ditolih. Komo pas ningali patung Pancoran mah... teu ditanya-tanya acan. Aneh, tara biasana!
Nu pasti mah, kuring asa meunang kangeunahan bin kanyamanan...hahaha. Jalan di Jakarta tea atuh, antara jam 5-6 sore mah meujeuhna padedet tah ku macet. Estuning ku sabar, Sekdes nyupiran meni lungguh ... bari dibarengan ku calung Darso tina tape mobil. Tah, ba'da magrib ahirna nepi ka tempat nu dijugjug. Wawarehan nyusul daratang, Kang Dedi ti Tanah Abang, Kang Asec ti Roxy, Teh Winda teuing ti mana, nepi ka Kuwu Rancabanyol datang ti daerah Cempaka Putih. Biasa, ngumpul teh di hiji rumah makan di daerah Kelapa Gading. Di dinya mah kasono teh tamplok. Komo sono ka dahareunna, da lapar ... beuteung geus salatri ti beurang keneh. Alhamdulillah, bagja pisan bisa tepung lawung jeung papada jalma nu beuki ngabaranyol. Hatur nuhun ah ka sadayana. Mugia babarayaan urang tiasa manjang salawasna. Ka baraya Banyolan Sunda nu sanes, hayu urang paheuyeuk-heuyeuk leungeun pikeun nambah duduluran... di mana wae ayana. *** Abah AminFollow:
