Demonstarasi

Ari nagara keur harengheng mah, kabeh ge asa jadi pasualan. Komo ampir unggal poe gedung dewan beak didemo. Aya demo ti mahasiswa nu hayang nungtut pamarentah sangkan nurunkeun harga sembako atawa bela KPK. Malah aya carita cenah, hiji waktu aya wartawan bule nu keur ngaliput demo mahasiswa, ngomong ka saurang mahasiswa:

“Kuring mah aneh. Di nagara kuring mah, lamun demo teh tara anarkis kieu. Aranjeun mah nepi ka maledog gedung jeung pejabat pamarentah make batu sagala. Yeuh, di nagara kuring mah, lamun maledog pejabat pamarentah nungtut nurunkeun sembako teh sok dibaledog ku endog atawa tomat! Tara ku batu. Teu hayang nurutan? Cik rada cerdas atuh saeutik!”

Eta mahasiswa langsung ngajawab:

“Silaing nu lieur mah. Atuh lebar maledogan make endog atawa tomat mah. Apanan eta nu diperjoangkeun ku urang-urang teh. Sangkan harga endog jeung tomat turun. Nyaho!”

Tah, kitu. Nepi lamun aparat jeung nu demo bentrok teh sok matak ceurik tukang nyieun pager. Da diitung-itung geus sabaraha kali maranehna ngaganti pager nu diraruksak. Tapi, aya oge nu untung. Eta nu kabagean proyek nggantian pager. Pikirna teh: “Sok raruksak deui lah pager teh. Atoh kuring mah! Lumayan bisa ngajukeun deui anggaran keur nyieun pager anyar!”

Aya untungna keneh pager teh dijieunna tina beusi. Coba lamun dijieunna tina emas. Kabayang ngagantiannana. Palias, tukang emas bakal surak. Komo deui lamun pagerna dijieun tina Batagor Riri atawa Surabi Imut mah. Atuh lain demo, nu aya ngadon beak didalahar. Sakalian jeung bumbuna cenah. Uenak tenan, mak nyussss!

Pentungan nu biasa dipake neunggeulan oge cenah bakal diganti ku: daun kiateul. Eta daun nu sok aya di ruyuk bisa dimangpaatkeun. Atuh pas digebugan ku daun nu matak ateul tea, anggeusna kabeh nu demo bakal beak gegetret. Tah, baju nu dipake aparat bisa make baju zirah nu sok dipake prajurit Romawi atawa minimal jiga baju Robocop. Tameng pelindungna mah ganti we make tampir atawa nyiru. Terus di tengahna make gambar si Cepot keur nyerengeh!

Tah, kumaha lamun nu demo bisa aya provokator atawa copet nu milu mangpaatkeun situasi? Gampil pisan. Sateuacan prung demo, eta provokator atawa copet sina daptar heula ka panitia. Kan engke teu hese lamun ditewak terus disiksa! Oge nu demo ameh kompak, kabeh ditalian ku tali rapia. Sambungkeun hiji-hiji nu demo teh. Tinggal ku koordinator lapangan dibetot ti tukang terus arahkeun, jiga nu jaga pare di sawah ngagebahkeun piit!

Inditna oge tong numpak beus atawa angkot rame-rame. Karunya ka supir. Mending leumpang. Contona ti Bandung urang rek demo di Bundarah HI atawa Gedung Istana Merdeka, leumpang we. Start-na mah bisa ti Gasibu atawa lapang GOR Saparua. Paling nepi ka Jakarta 4 poe. Nu gelo ge kuateun leumpang ti Bandung nepi Cirebon kalayan mapay-mapay jalan. Maenya urang nu waras henteu bisa! Jaba urang mah leumpangna abring-abringan lobaan. Tingali, nu gelo mah apanan nyorangan we mun leumpang mapay-mapay jalan teh, tara abring-abringan! Era atuh ku nu gelo! Sok, di mana aya nu gelo demo? Bener teu? Mun hayang gancang mah, make jalan shortcut alias jalan pintas. Urang bisa leumpang abring-abringan make jalan tol Padaleunyi-Cikampek-Cikarang-nepi ka jalan tol Cawang!

****

Tatangga kuring mah kamari ngajak demo. Manehna ngajamin yen mun kuring milu demo, bakal meunang duit dupuluh rebu jeung kupon. Kupon? Heueuh. Eta kupon teh make nomer. Tah pas engke beres demo, eta kupon bakal diundi. Nu beruntung bakal meunang doorprize, nyaeta sapedah 20 inch, kulkas berwarna 9 pintu, mesin cuci antigetar, DVD player 2 band, HP Samsung L-300, jeung voucher menginap 7 hari 2 malam di hotel prodeo bersama Ryan “mutilasi” jeung Sumanto. Berminat ngiringan demo bersama? Tong hilap nyandak tuangeun kana bogem atawa rantang. Urang sakalian botram lah.

Peryogi kauninga, ieu draft PANITIA DEMO nu mutakhir:
- Koordinator Lapangan
- Seksi Konsumsi
- Seksi Ngadamel Spanduk
- Seksi Jojorowakan
- Seksi Busana Pendemo
- Seksi TOA - Amplifier
- Seksi Mulungan Runtah
- Seksi Barikade & Ngeleketek Aparat
- Seksi Keamanan dan Kenyamanan
- Seksi Digebugan jeung Ditewakan ku Aparat
- Seksi Pendaptaran Copet jeung Provokator
- Seksi Dokumentasi:
- Seksi nu Nyokot Kapur ka Ruang TU
- Seksi Humas..wati
- Seksi Pengumpulan Baju Bekas
- Seksi Hiburan Dangdut/Electone-an © Abah Amin

Follow: