Tukang Padung Joged

Basa hajat nyunatan Jang Dimas, nu boga hajat nanggap elekton sapeuting jeput. Da pas derna, atuh kaom mutu mah da marotah pisan. Ngengklak peperengkelan teu malire kana kaayaan, nu penting senang. Gitek-geol-gitek-geol! Maklum di lembur da jarang atuh aya nu kieu teh. Basa Nyi Odah, artis idola Kampung Rancabanyol, ngahaleuangkeun lagu Pengen Njerit... eta mah Komandan Hansip riweuh pisan misah nu gelut akibat paketrok siku.

"Geus..geus! Joged mah joged we siah...gelut muh tuh di ditu di lapang voli!" ceuk Komandan Hansip bari ngadudut Mang Mulyana nu keur ngajenggut buuk Sekdes.
"Da silaing atuh ngadupak uing!" ceuk Kang Mulyana.

"Ilaing siah nu mulai... joged make ngabura sagala!" ceuk Sekdes embung eleh.
"Meunggeus! Hayang dibabuk ku pentungan?" ceuk Komandan Hansip. Antukna eta nu gelut teh eureun ningali Komandan Hansip nyereng mah. Maranehna nuluykeun deui joged.

Teu jauh ti nu rek gelut tadi, Tukang Padung gagaleongan, meureun bakating ku lieur... tuda samemeh joged ngaleueut heula 2 botol Cap Ciput Miring. Manehna joged misah ti batur. Bari sakali-kali teurab, panon caleuy, beungeut kusem, baham bau alkohol. Manehna joged bari sosolontodan. Na atuh keur kitu teh... teu lila:
"Ajig!" manehna nyereng semu nyentak. Joged deui, "ajig! Ngajak gelut ka aing siah? Wawanian nya ka aing!"

Manehna ambek, leungeunna meureup. Siap-siap ngahapuk nu aya hareupeunna.
Buuuuk! Buuuuk!
"Ajowwwwwwww... teuas oge eta leungeun sia! Boga elmu naon siah silaing, hah?!" tuluy manehna ngahantem deui. Ramona kekepehan, nahan nyeri. Pas rek ngarontok musuh nu dianggap geus nyenggol leungeunna...
"Naaaa... aya-aya wae ieu jelema. Abong keur mabok," Hansip langsung ngajewang Tukang Padung nu rek neunggeul deui: Tihang panggung!

Follow: