Balap Marmot

Basa minggu kamari di Rancabanyol, ku alpukahna Bah Ocin, diayakeun lomba balap marmot. Lintasanna ge ngahaja dijieun khusus. Atuh marmot nu miluan lomba ge lain marmot samanea. Marmot Ki Ubbay mah panan, geus awakna badag...kumisna ampir sarua jeung nu bogana. Marmot Sekdes mah jiga pisan buuk punk, ngahaja dirancungkeun. Marmot Kang Mulyana, geus mah panjang tapi awakna ceper...jiga sosis. Tapi lumpatna ngabelenyeng. Nu aneh mah marmot Jang Epul, unggal satengah jam kudu we dibere nginum kopi Abese Nenen...jigana mah geus katagihan kana kopi susu.

Tah, basa kamari lomba balap marmot teh, loba kalakuan aneh-aneh. Marmot Mang Ndien, pas lumpat teh hayoh we cicing. Pas eta oge daek lumpat kumeh Mang Ndien ningalikeun peso: "Sok siah, mun teu lumpat...ku uing disate!". Ari marmot Ki Camat, awakna hengker... ngan mengi wae. Teuing kumeh loba cicing di Lembang meureun, katiisan. Aya deui marmot Mang Roen, lumpatna guyat-geyot. Da pas sababaraha meter eta marmot ngabecir, aya sora lagu Alamat Palsu!

Ngan palias, basa keur lomba...eta mah marmot Cep Edoy geus panghareupna ti start keneh ge. Ngan pas sababarah senti deui ka finish, eta marmot ngadon balik kanan... balik deui ka dununganna. Kitu tah ari marmot loba dimanja teh. Ari marmot Kang Teja, karek satengah lintasan ge geus mengkol ka sisi... meureun rek ka pit stop heula. Puguh jadi jauh katinggaleun. Akhirna, nu jadi juara kahiji marmotna NOS (Nitrous Oxide Systems), loba teuing lalajo film Fast and Furious jigana mah!

Follow: