Kongres Rancabanyol (29 Juni 2011)

Caritana mah warga Rancabanyol nu dipingpin ku Lurah katut Camat ngayakeun kagiatan Kongres di bumina Pa Camat Rancabanyol di Jayagiri-Lembang. Teu sangka geuning nu datang teh ti unggal juru, aya nu ti Riau (Kang Che Cep Yopi), ti Bekasi (Teh Ida Rina), ti Jakarta (Kang Dedi Akung), ti wetan aya urang Rancaekek (Nyai Endit), ti Cimahi aya Ki Ubbay, nepi nu datang ti Cigondewah (Kang Hadad).

Riung mungpulung aya kana puluhan, alhamdulillah karaos tur kahartos. Karaos waregna da disuguhan ketan beuleum, kopi, udud, liwet, jagong beuleum, jrrd. Ari kongresna? Teu beda jauh jeung PSSI... Persatuan Sangacaprakna Sakahayang Ilaing. Hasilna? Teuing atuh, da loba keneh seuri daripada ngabahas nu serieus. Ngabahas radio Rancabanyol... notog kana kumis. Ngabahas anggaran RT, nobros kana es krim. Ngabahas rencana Kopdar Akbar... der kalahkah ngabahas lagu "Intimi" - Bungsu Bandung.

Ari di luar teu eureun nu ngageber beuleum ketan, bari beak diasaan ku sorangan. Nu itu hayoh nyumput di juru bari nangkeup keler kueh. Nu beulah ditu ngadon beak popotoan jeung ceuceuleukeuteukan. Nu lainna, hayoh we ngelepus udud jiga kareta. Nu jangkung badag, beres dahar teh ngadon nundutan. Nu lain nyarande kana tembok bari ngusapan beuteung! Atuh kokolotna saruana, kalahkah ngusapan kumis. Tapi nu penting mah urang tos silaturahmi. Asa 4 abad wae can panggih. Silih pikasono.... jiga Romeo sono ka Luna Maya!

Mangga, ieu dokumentasi videona:

Follow: