Banyolan Pondok 1

#
"Bosen euy bobogohan teh!"
"Lebar atuh euy. Memang geus sabaraha lila maneh bobogohan?"
"15 taun!"

#
Tengah peuting. Di gang nu lumayan sepi. Aya preman nu malak.
"Cik, duit lah euy! Aing hayang mabok!"
"Sumpah, Kang. Abdi mah teu gaduh artos!"
"Nu baleg! Tong ngabohong ka uing, bisi didodet!"
"Muhun, sing demi Kang. Ieu tingal, loket abdi kosong pisan, pan? Aya oge roko, bade?"
"Embung ah! Uing mah tara ngaroko.... makruh deuleu!"

#
"Bu, abdi bade ka pasar. Bade nitip naon?"
"Nitip pangagaleuhkeun dreum! Ieu artosna. Panggul wae nya dreumna."

#
"Sakeudeung deui Pangeran William jeung Kate Middleton kawin euy!"
"Rame jigana nya euy hiburan organ tunggalna?"

#
Aya wanoja ngajentul sisi jalan. Teu lila aya angkot nyisi. Supir angkot nanya:
"Kalapa, Neng?"
"Ohh... muhun. Cik meser 2 hulu mah. Caina wungkul."
"Geulis-geulis, lieur sugan mah. Kebon Kalapa maksud teh!"

#
"Neng, gaduh Pin BB? Nomer Pin BB-na sabaraha, Neng?"
"Teu gaduh Kang. Kaleresan abdi mah tara ka Posyandu. Tara di-PIN!"

#
Di restoran fastfood.
"Bill-nya mau dibayar sekarang?"
"Yeh, saha nu nraktir si Bill? Sina mayar olangan we. Wawuh ge henteu!"

#
"Maneh jago catur kan?"
"Enya kitu lah. Ngan teu ahli. Aya naon kitu?"
"Isuk malem Minggu bisa maturan ka imah kabogoh uing?"
"Rek naon?"
"Kesel aing mah, tiap apel dititah wae ngalawanan catur jeung calon mitoha. Sugan ari maneh ngabaturan uing mah, bisa ngagantian uing ngalawan catur manehna. Hayang ngasaan kumaha rasana ngobrol jeung kabogoh!"
"Mmmh... karunya teuing maneh. Atuh jadi ngaapelan calon mitoha ari kitu mah!"
"Puguhan datang ka imahna, pasti langsung disadiaan papan catur. Nepi tengah peuting catur jeung catur we! Can pernah ngasaan ngobrol diuk bareng jeung si yayang!"

#
"Ku naon ieu imah paroek kieu? Ngajepret listrikna? Naha tatangga mah harurung da."
"Dendam uing mah ka PLN. Aliran wae tuda. Cik ayeuna kumaha rasana siah keur hurung, ieu listrik di imah ku uing dipareuman! Rugi siah PLN!"
"Dasar jelema seblu!"

#
Geus nepi imah.
"Ku naon eta motor didodorong sagala?"
"Beak bensin euy!"
"Beak bensin dimana?"
"Tadi, di palebah POM Bensin!"
"Naha atuh teu meuli?"
"Puguhan loket tinggaleun. Ma enya kudu nganjuk mah ka POM bensin?"
"Lain nelepon atuh ka uing? Ku uing disusulan ka ditu!"
"Pulsana beak! Rek nginjeum HP ka batur.... gengsi tuda!"
"Lebok tah gengsi!! Eta ngaranna sial dijijieun teh.!"


#
Nu keur daremo.
"Kita harus memberantas segala bentuk korupsi di negara ini! Kikis habis pejabat busuk... lintah penghisap kesejahteraan negara dan bangsa. Gantung koruptor!! Parud koruptor!! Binasakan korupsi di negeri tercinta ini. Setujuuu?!!"
"Setujuuuuu!!"

Beres demo. Maranehna patingharuleng.
"Kamana nya koordinator teh? Geus sajam teu kadeuleu cukang irungna! Nungguan pembagian duit lima puluh rebu ge nepi ka kesel kieu!"
"Heueuh, boa-boa urang kabehan ditipu euy! Duitna dibawa kabur ku si koordinator!"
"Maneh wawuh jeung si koordinator demo teu?"
"Henteu!"
"Cilaka dua belas!! Aing mah jaba lapar, pesak kempes.... aya bahan balik nikreuh yeuh!"

#
Pantesan urang Sunda mah hese majuna. Tingali we eta na status Facebook, teu saeutik nu PD sok nulis jiga kieu:
"Kuring mah bangga jadi urang Sunda! Hayu urang mencintai kabudayaan urang sendiri! Saha deui atuh nu kudu bangga, salain urang Sunda sorangan."

Harti kecap bangga dina basa Sunda = 'susah, hese' (maksudna mah reueus meureun.)

#
Urang Sunda mah bisa kasebut saroleh... resep nyumbang. Eta we contona mun Pemilu, ngan ukur bisa nyumbang sora di TPS. Ari nu jaradi pangagung nagara mah asa langka nu ti urang Sunda sorangan.

#
Lamun waktuna pengumuman kalulusan ujian, para murid teu saeutik nu ngarayakeun ku jalan nyoretan baju saragam ku Pylox jeung abring-abringan/konvoi naek motor. Pas ditanya, naha bet kikituan? Jawabna:
"Bebaaaaaas euy!!"

(Naha sakola teh dianggap penjara kitu?)

#
Tadina mah rek ulin ngurilingan kota, ngan....
Priiiiiiiiiiiiiittt!
"Pa, punten pisan. Sanes abdi bade protes. Mung, abdi ti bumi dugi ka dieu teh... tos dicegat ku operasi 4 kali. Ayeuna ka-5 kalina!"
"Eh, alus atuh. Empat sehat, lima sempurna. Mana SIM jeung STNK?"

#
"Tos wae, Neng! Ayeuna mah urang putus we. Akang tos teu kiat! Da naon geuning tos asa hapa cinta diantara urang duaan teh. Punten, sanes Akang teu cinta ka Eneng!"
"Ulaaaaaaah!! Ulaaaaaaah, Kang! Ulah waka mutuskeun, Eneng! Hik...hik...hik..."
"Naon? Eneng cinta pisan ka Akang?"
"Sanes Kang! Hutang Akang ka Eneng apanan teu acan lunas. Engke pami tos lunas, sok putus ge teu nanaon!"

#
Aya bapa-bapa ngajentul di sisi jalan. Teu lila aya turis nyampeurkeun bari mawa peta.
"Punten Pa, bade tumaros."
"Mangga. Bade naroskeun naon?"
"Euh..euh...euh, dupi Bapa jalmi atanapi dakocan?"

#
Di masjid, barudak keur pupujian, dihaleuangkeun dina TOA:
"Eling-eling umaaat
Muslimin muslimat
Hayuuu urang berjamaaah....
Hitut nya siah maneh, Udi? Bau pisan siah ngabekok teh!!"

#
"Nyai kabogoh Akang, pujaan hate nu dipikaasih unggal waktos. Leres Nyai teh cinta ka Akang?"
"Ih, leres pisan atuh, Kang!"
"Emmh... aya ku bagja Akang mah. Sagala kahoyong Nyai baris ditedunan ku Akang. Hoyong naon salira teh? Pek carioskeun..."
"Hoyong.... hoyong...hoyong Ferrari anyar!"
"Nyi, punten tiasa putus ayeuna keneh?!!! Dupi stok tambang, peso cutter, racun beurit, sareng Baygon.. aya keneh?"

#
"Tos kelas sabaraha ayeuna putra teh?"
"Ke, panan abdi gaduh 3 putra teh! Putra nu mana, nya?"
"Eta.... nu kelas 5 geuning!"

#
"Jadi euy nyieun balong leutik keur pengobatan alternatif make lauk teh?"
"Jadi. Ngan bangkrut euy!"
"Naha?"
"Salah milih laukna euy. Kuduna dipelakan lauk garafura, ari ieu ku lauk piranha!"

#
"Mang, madu sabotolna sabaraha ieu teh?"
"Lima puluh rebu."
"Maduna asli, Mang?"
"Asli atuh, Cep!"
"Tilu lima wae nya, Mang?"
"Wah, teu tiasa atuh Cep. Modal nambihan gulana ge kirang!"

#
Ceuk saha nagara urang miskin? Bohong eta mah. Buktina, geuning itu bisa nyieun gedong dewan nepi ka triliunan.... studi banding ge panan milyaran rupiah.

#
"Pemilu 2014 mah kuring rek nyalonkeun jadi rahayat ah!"

#
Di imah jelema beunghar.
"Bu, abdi bade neda heula, wios? Ti enjing keneh teu acan sarapan," ceuk pembantu.
"Ke heula, itu si Plekih geus diparaban can? Tong poho si Nonot bere Whiskas!"

#
Mandor keur laporan ka dunungan.
"Kumaha ngagali sumur teh geus beres?"
"Atos juragan! Mung itu... nu didamel...euh...euh..."
"Ku naon?"
"Aralimeun naraek. Mogok kerja. Ti kamari caricing di lebet sumur. Saurna moal naraek, sateuacan tungtutan tunggakan pembayaran upah kerja dibayarkeun!"

© Abah Amin

Follow: