Untung Usum Selfie di Jaman Kiwari

Bari ngadu bako di pos ronda.
"Sok hayang seuri Mang jaman kiwari mah. Eta nu sok selpi alias moto beungeut sorangan, meni usum nya!" ceuk Mang Endin.
"Heueuh Mang. Nanaon ge ayeuna mah diselpikeun. Di tempat wisata...selpi. Di tempat hajatan...selpi. Dahar di restoran.. selpi. Papanggih jeung selebritis selpie. Nepi nu ziarah ka Mekah, asa loba ningali teh nu sarelpi latarna Ka'bah..." ceuk Mang Epul.
"Eh, tong boroning kitu! Urusan popotoan mah, aya nu kacilakaan ge, teu saeutik nu sibuk jeprat-jepret! Teuing hayang up to date alias kekinian meureun demi posting jeung kasebut jalmi gaul di medsos!"
"Epek tina ayana smartphone nya Mang? Dipadukeun jeung jaringan internet nu leuwih gampang jaman kiwari mah!"
"Enya Mang. Baheula mah tuda, hayang nelepon, ngarekam video, ngarekam sora, nepi popotoan ge misah-misah. Beda jeung jaman kiwari... kabeh aya na hiji alat,"
"Puguh Mang. Kawas alo kuring kamari rada manyun kumeh hayang pangmeulikeun HP anyar nu kamerana alus, nu khusus keur selpi cenah! Eta ti barudak ge ayeuna mah geus jadi budaya selpi teh."
"Tah, kawas di Bandung. Unggal aya tempat wisata anyar, na medsos teh langsung murudul poto-poto selpi nu diposting. Kabayang eta juragan nu boga medsos kumaha pinuhna paragi pusat neundeunan gambar!"
"Uing mah Mang, kabayang mun selpi usumna di jaman urang-urang... jaman Harmoko jadi menteri penerangan!"
"Naon kitu?"
"Heueuh, panan baheula mah mun popotoan teh kudu make rol film. Teu kabayang mun selpi usumna jaman harita. Meureun beak sabaraha rol film nya?"
"Bener oge. Acan kudu ngingkig ka studio foto pikeun cuci cetak. Acan kudu milihan mun aya klise nu kabakar. Waaaah.. riweuh Mang!"
"Beak albeum sabaraha ratus meureun nya? Ayeuna mah kari jepret.. tuluy hasilna ditempo langsung. Mun alus langung posting, mun goreng langsung pupus tina HP."
"Ari uing mah, kabayang selpi jaman nyieun Candi Borobudur. Lain garawe meureun, sarelpi hareupeun Borobudur nu keur dijieun we meureun!"
"Mmmh.. uing mah leuwih jauh ngahayalna Mang. Kumaha mun selpi usumna jaman Nabi Musa. Meureun sibuk marotoan batu Piramida nu sakitu garedena. Tuluy, laut keur beulah teh lain nyaringkah.. ngadon diparotoan!"
"Hahaha.. sok diwawaas ilaing mah! Keun we beda jaman, beda kabiasaan..."

Follow: