Banyol Pilpres (1)
"Lain, ari maneh Capres resep ka saha?" tanya Mang Emplud.
"Ah, uing mah ka Prabowo ka Jokowi ge teu resep!" jawab Mang Juhro bari nyekeskeun korek.
"Yeeh! Golput silaing teh, hah?!!" Mang Emplud rada muncereng
"Uing mah resepna ka Jupe jeung Aura Kasih! Teu resep ka jalu deui mah!" jawab Mang Juhro bangun nu santey.
"Seblu dasar! Hanas aing ngajak serieus!"
"Da silaing mah pasti mun dianggap, kadituna bakal ngajak debat. Marebutkeun pepesan kosong... jadi we debat politik warung kopi. Asa aya bahan keur adu renyom, ngabustam bari teu puguh hulu buntutna. Ngadadak jadi analis pulitik kajajaden. Tiap aing beda saeutik, langsung we ku silaing disanggah. Nepi ka ranteng urat beuheung maneh mah ari geus ngabela capres kameumeut teh. Tapi, tungtungna... angger we aing nu nitah mayar cikopi jeung bala-bala mah!"
"Hehehe... puguhan eta maksud mancing nanya eta teh! Hampura we sakali deui ieu mah bayarkeun deui!"
"Kuma sia we ah. Menta ka capres idaman silaing tah keur mayar kopi mah!"
"Nyeta puguh teu wawuh! Da mun wawuh mah geus dipenta keur meuli udud dua bungkus mah!"
Follow:
