Buka Bersama Baraya Banyolan Sunda (Ramadhan 1433 H)

Acara buka bersama baraya Banyolan Sunda Ramadhan 1433 H diayakeun tanggal 12 Agustus 2012 nu dilaksanakeun di rumah makan Sari Sunda Jalan Soekarno-Hatta Bandung. Ieu acara minangka wadah silaturahmi dina sasih nu suci. Alhamdulillah, baraya nu ngahadiran ieu acara aya kana saratus urangna. Baraya nu datang ti siklak ti siklukna, aya nu ti Majalengka, Cianjur, Jakarta, Sumedang, Purwakarta, Bogor, Garut, Tasikmalaya, tos puguh nu dumuk di Bandung mah. Acara ieu oge bisa kalaksanakeun kalayan gawe bareng jeung Radio Baraya Sunda (RBS) oge komunitas-komunitas lainna (Salakanagara, Pusat Humor Indonesia, Fiksimini Sunda, jrrd.).

Uleman ka baraya pikeun miluan acara, biasa we ngaliwatan media jejaring sosial Facebook. Oge media lainna, SMS atawa BBM-an. Acarana mah dieusi ku silih pikawanoh papada baraya oge ngadubako ngeunaan perluna urang Sunda leuwih ngahiji jeung silih pikawanoh. Sababaraha hal nu jadi inti obrolan nyaeta, najan beda-beda komunitas alatan pangaresep masing-masing, ngan alusna komunitas-komunitas nu aya bisa silih ngaraketkeun jumplukan pikeun ngahiji kalayan niat nanjeurkeun jeung ngawanohkeun Ki Sunda ku pangaresep widang masing-masing. Atuh di dieu ge katembong yen potensi baraya Sunda teh euyeub pisan, aya nu resep widang seni, widang sastra, widang usaha, widang pamarentahan/birokrasi, nepi widang sosial kamasarakatan. Hal ieu nyirikeun yen urang Sunda mun ngahiji bakal leuwih kuat tur mibanda ajen pikeun kamajuan urang Sunda sorangan.

Follow: