Kajajaden

Peuting pas liwat jambatan Citarum, Sekdes ngeureunkeun motorna. Katingal ku manehna aya awewe keur arek naek kana tihang jambatan.

"Neng! Ulah luluasan kitu!" ceuk Sekdes bari metot eta awewe sina turun.
"Bosen tuda hirup teh beak dicarekan! Mending abdi bunuh diri!" ceuk eta awewe.
"Tapi Neng, ulah kitu.... dosa bunuh diri teh. Matak teu ditarima ku langit jeung bumi! Dibendu ku Gusti!" ceuk Sekdes mapagahan.

Antukna si awewe teh leuleuy, tuluy neuteup Sekdes.
"Duuuh, aya ku reueus. Aya keneh geuning nu perhatian ka sim kuring! Hatur nuhun, Akang!" ceuk si awewe, bari tuluy nangkeup tipepereket balas ku bungah. Malah.... malah, celemot! Eta awewe nyium Sekdes bangun nu geugeut. Sekdes olohok sakedapan... antara reuwas jeung atoh. Ngan manehna ge asa dijalanan... celemot, malik wani nyium pipi jeung biwir si awewe. Bulan di luhur nyaangan. Sekdes balik deui kana logika.. embung kabawa perasaan. Da mun ngagugu napsu mah, matak bakal leuwih atuh. Ahirna Sekdes nanya:

"Ke..ke... heula, ku naon Eneng teh bet bade bunuh diri sagala? Putus cinta?"
"Bosen tuda Kang. Ku kulawarga abdi ampir unggal dinten dicarekan, malah ku bapa mah sok dikepret... kumeh abdi sok nganggo wae acuk sareng dangdan kawas istri!"

Sekdes molohok... ningali beuheung si awewe:
"Beu!!! Eta jakuuuuun!" bari manehna tuluy ciciduh jiga nu palal.

Follow: