Rancabanyol Taun 2388
"Ma, ari bangkong teh naon?" tanya Jang George Uhe ka indungna.
"Euh, ilaing mah teu ngalaman nya Jang kumaha rupana bangkong? Bangkong teh sato nu bisa ngaclog. Terahir teh aya di Bandung kidul taun 2378. Ngan hanjakal, eta bangkong hiji-hijina teh paeh.
Nya, eta salah sahiji ciri yen ayeuna geus abad teknologi. Dunya geus kawilang canggihna. Jang Uhe indit sakola ge teu perlu ripuh jiga taun 2010. Manehna tinggal diuk na korsi, disorot cahaya. Dina sababaraha detik, langsung geus aya di kelas. Barudak sakola ge euweuh istilah kabeurangan. Atuh guruna ge diganti ku robot. Matakna katelah aya robot honorer jeung robot bantu. Bedana teh, guru robot ieu mah tara demo.
Atuh, jelema bisa ngapung ge lain carita. Ampir kabel jelema boga alat pikeun bisa ngapung. Hal ieu pikeun ngagampangkeun pagawean. Atuh, kadang jelema teh mun jalan-jalan sok di awang-awang wae. Ngan eta, riweuh teh lamun aya demo atawa bobotoh Persib nu rek lalajo mengbal. Di luhur teh atuh siga lalay waktu magrib kaluar ti guha....
Nu aneh mah nyieun budak. Da carita salaki pamajikan kudu asup ka kamer pikeun sapatemon teh lain kawajiba atawa ritual husus. Bisa wae make jalan lain, contona lamun pamajikan keur "hayang", terus manehna menta ka salakina... si salaki ngan ngajawab wae dina SMS: Mah, ngadamel dedena didownload wae nyalira nya? Ieu ku papah diupload ayeuna.
Kitu oge alat komunikasi. HP teh geus kaasup barang jadul. Jelema jaman 2388 mah geus boga nomer sorangan dina awakna. Jadi mun aya telepon asup teh, tara diangkat... ngan langsung ngomong sorangan wae. Pasilitas speaker napel na ceuli, keypad aya na dampal leungeun, layar aya na panon, batre make sensor panas tubuh. Matakna, teu aneh meureun mun nu gelo ge kadang sok bingung... da jelema loba nu ngaromong sorangan.
Masalah sistem pamarentahan, alhamdulillah geus aman. Euweuh jelema nu korupsi. Kabeh pejabat pamarentah dipasangan sensor na awakna. Lamun manehna ngalakukeun korupsi, eta sensor bakal mere warning jeung mere hukuman langsung. Contona mun darmaji, alias ngadahar lima ngaku hiji... dina awakna bakal karasa aya nu nyiwit. Lamun korupsi ratusan rebu, dina awakna bakal karasa kasetrum. Lamun korupsi jutaan.... awakna langsung leuleus tuluy beye...jiga boneka Teletubbies. Tah, lamun korupsi milyaran, hukumanana? bobogaanana langsung leungit! Lamun korupsi nepi ka triliunan? Sirahna langsung robah jadi sagede samangka... awak jadi sagede boneka Barbie. Terus dina tarangna aya tulisan: sumpah, abdi koruptor! Eta cap napel na tarang saumur hirup. Jeung "bonus" lainna: ngomongna robah jiga sora bagong: bari sesegrok!
Follow:
