Wawancara jeung Nu Gelo

Kuring keur diajar jadi wartawan. Hiji waktu ditugaskeun pikeun neangan narasumber. Arek ngawawancara artis, da minder. Arek ngawawancara pejabat, sieun ku protokoler. Arek ngawawancara mitoha... keur naoneun. Hal kitu mah bisa nanya ka pamajikan. Ahirna, kuring boga ideu. Panan cenah, ceuk istilah wartawan mah: "Anjing mengigit manusia, itu berita biasa. Manusia menggigit anjing, itu berita luar biasa!". Komo meureun lamun manusia menggigit tihang listrik mah!

Nya kuring panggih jeung narasumber: nu gelo. Manehna sok mangkal di parapatan lima (lieur pisan, geus mah parapatan... der disebut lima!). Eta nu gelo geus saged, diuk hareupeun kuring. Kuring ngaluarkeun alat rekaman jeung catetan. Ieu petikan wawancara teh:

Kuring (nu ngawawancara): "Dupi nami bapa saha?"
Nu gelo (narasumber): "Abdi? lampu stopan!"
Kuring: "Tos lami janten nu gelo?"
Nu Gelo: "Hehehehehe.... mensana in corpore sano!"
Kuring: "Bapa kawit ti mana?"

Nu Gelo: "Blaktuk...blaktuk... yihaaaaaaaaa!"
Kuring: "Bapa ngartos kana patarosan kuring?"

Nu Gelo: "Yeeeey... Arjuna. Kuring ngarti pisan kana kahayang hidep. Yap, dieu dilahun ku ama!"

Kuring: "Cenah Bapa teh gelo! Tapi naha.... Bapa sok dahar? Panan teu inget jeung teu ngarti nanaon?"

Nu Gelo: "Gandeng siah! Koruptor ge tara ngahakan tabung gas!"

Kuring: "Tah, mimiti nyambung. Ari Bapa gelo teh ti iraha?"

Nu Gelo: "Ti saprak ngawitan tepang. Hate jadi hariwang. Inggis anjeun teu surti... tejo! Bading eung... bading eung... padungpangpak... blaktuk..blaktuk!"

Kuring: "Pa! Cik atuh sing rada nyambung ngajawab teh!"

Nu Gelo: "Kumaha aing we siah! Naha ngangatur aing sagala siah? Presiden aing ge lain sia teh!"

Kuring: "Eh.. aing mah nanya bener. Tapi, naha ilaing ngajawab ngacapruk?"

Nu Gelo: "Pananan aing mah nu gelo! Nya kumaha aing we siah!"

Kuring: "Heueuh! Kajeun gelo ge... cik atuh boga perikemanusiaan saeutik. Da aing ge cape. Jaba keur diajar ngawawancara deuih ieu teh!"

Nu Gelo: "Na sia jadi nyereng ka aing? Ngajak gelut sia teh?!" (Nyekel kerah baju kuring)

Kuring: "Teu sieun siah aing mah!" (ngacungkeun peureup)

Isukna dina headline koran; nu satadina rek diasupan hasil wawancara ku kuring:

Seorang Pemuda Edan Berkelahi dengan Orang Gila di Perempatan Lima.

Follow: