Riung Mungpulung Baraya BS di Cicalengka
Mimitina mah basa poe Saptu, 17 Juli 2010, cenah aya beja Kang Dedi Sobari nu ngumbara di Jakarta rek ulin ka Bandung. Geus kabiasaan, lamun aya baraya nu rek nganjang... baraya BS nu lainna siap-siap mapagkeun. Kabeneran poe harita Kang Dedi datang ka Bandung teh wanci isya. Meujeuhna Bandung keur tiris, da ti beurang keneh hujan teu eureun. Ahirna, tempat mah angger we jadi basecamp teh di Rancabolang. Kapaksa imah Sekdes Rancabanyol jadi tempat pangiuhan dina peuting harita. Tadina mah moal niat mondok. Tapi dalah kumaha, Mang Ndien, Icham, jeung Vitman jiga nu hoream balik deui. Teuing kumeh Kang Dedi euweuh batur.Da peuting harita mah ngariung teh dibaturan ku cikopi, martabak, jeung bubur kacang hejo... asa ku ni'mat. Nepi ka janari ngadubako di loteng. Ampir jam 3, niat mah ngagalebra. Tapi ngaranna oge adrenalin ngacapruk geus bijil, aya we gogonjakan nu kaluar teh. Komo eta Kang Jack nu masih keneh lalayaran jeung kapal tankerna di tengah laut... haben nelepon. Cenah hayang luncat ti laut ngajugjug baraya nu keur ngariung. Kabayang atuh ampir 9 bulan di laut hantem wae dibibita.
Tah, lamun baraya Banyolan Sunda kaayeunakeun bisi ngarasa heran kunaon bet aya celetukan: "Cabut kabelna!" eta aya kasang tukangna. Harita basa rek siap-siap ngaguher, kabeneran Mang Ndien ti heula geus nyorang alam ngimpi. Na atuh... manehna jug nyegrek... meureun balas kucape. Ari Kang Dedi, balas ku cape ti Jakarta, manehna mah sare di rohangan sabeulah. Tah Jang Icham mah anteng we ngoprek laptop Kang Dedi... FB-an da meureun sono ka urang Cimahi. Tapi teu lila laptop teh dipareuman, da meureun Icham ge tunduh.
Balik deui ka Mang Ndien, teuing kunaon eta mah kuring jug masang recorder alias rekaman di HP teh. Mang Ndien nu keur nyegrek... direkam. Krrr...krrr...krrr... nguk! Krrr...krrr..ngik! Tah, pas disetel deui, eta sora matak endah mancing pikaseurieun. Atuh kuring, Vitman, jeung Icham ngagakgak nepi ka panon cirambay. Mang Ndien mah angger we ngaguher dibarung ku sora "ajaibna". Di dinya kuring nyeletuk ka Icham: "Keun bae Cham, Mang Ndien teh keur di-charge. Karunya tadi beurang capeeun!" Karek ge beres ngomong kitu, Kang Dedi nu tadi tibra sare, ujug-ujug ngomong: "Bah... cabut kabelna!!" Eta mah jam 3.30 kabeh ngagakgak deui. Heueuh da eta tuda Kang Dedi bet bisa nyambung, panan urang-urang teh keur fokus nyaritakeun Mang Ndien nu nyegrek. Maenya Mang Ndien kudu dicabut kabelna? Atuh karunya di-charge-na can beres!!! Semu ngalindur, Kang Dedi nempas: "Maksud teh eta laptop uing cabut kabelna. Batrena geus pinuh!!"
18 Juli 2o10, jam 5-an, ba'da salat subuh... kabeh geus harudang. Nya dina wanci ieu maheutkeun rek ulin ka imah Kang Dedi di Cicalengka (lembur Dampit). Gancang carita kabeh siap-siap. Tadina mah rek nyewa mobil... ngan euweuh mobil nu bisa leupas konci alias ngarentalna tanpa supir. Ah, kapaksa gunakeun alat transportasi nu aya. Lain kabeh baraya ge mawa motor. Malahan, anggota nambahan deui pas rek indit teh, Jang Irfan milu gabung. Salutlah kuring mah ka Jang Irfan nu sok sumanget mun aya kumpul ngariung baraya BS teh. (Sanajan beres kagiatan di Cicalengka, manehna balik ti heula da ngadadak aya telepon ti dulurna yen Uwana ngantunkeun. Innalillahi wainnailaihi rajiu'un.)
Singket carita baraya ngajugjug ka imah Kang Dedi. Bener, balongna lega. Malah nguseup make goreng sampeu ge langsung nyanggut tah lauk teh. Tapi nu leuwih mantap mah ngariung di saung tuang sagala nu disuguhkeun. Hatur nuhun ah kanggo Kang Dedi sakulawarga!! Katampi pisan. Beres ngeusi beuteung, langsung cabut ka Curug Cinulang. Nepi ka tempat wisata di Bandung wetan ieu.... geuningan loba jalma. Utamana mah nu barobogohan, nepi ka unggal pengkolan di sajajalaneun teu weleh loba pasangan keur dariuk na motor. Endahna cinta saendah pamandangan nu aya di satungtung deuleu kaendahan alam nu aya di handapeun jalan ka Curug Cinulang.
Ngan edas, pas nepi Curug Cinulang... hujan ngagebret. Kapaksa ngiuhan di warung. Ari Icham jeung Sekdes mah medar kasono di handapeun curug pisan. Manehna duaan bucis! Jiga biruang geus ngeueum. Tah, di dieu bijil deui sajarah anyar anu katelah "Wiweh". Naon atuh "wiweh" teh? Teu pira eta asalna mah ti budakna Sekdes Rancabanyol.... sapanjang lalampahan di Cicalengka teu weleh ngomong: "Papa... wiweh! Waka-waka wiweh" Beu, ari geus indungna nerjamahkeun mah, kaharti tah naon maksud omongan budak, geuningan maksudna mah hayang kueh... bari terus manehna nyanyi jiga theme song Piala Dunia 2010 nu dihaleuangkeun ku Neng Shakira.
Tah kitu lur lalampahan tepang sono sareng Kang Dedi teh. Bilih panasaran kana lalampahan baraya BS salami di Curug Cinulang (Cicalengka), sumangga klik wae video di handap ieu. Hatur nuhun ka baraya sadaya nu masih keneh maheutkeun tali silaturahmi kalayan media banyolan jeung gogonjakan. Neda pangapunten bilih aya kalepatan, boh nu dihaja atanapi teu dihaja. Hurip BS!Follow:
